திருவாதிரை பாடல்கள்

பாடலன் நான்மறையன் படிபட்ட கோலத்தன் திங்கள்

சூடலன் மூவிலைய சூலம் வலனேந்திக்

கூடலர் மூவெயிலும் எரியுண்ணக் கூரெரிகொண் டெல்லி

ஆடலன் ஆதிரையன் ஆரூர் அமர்ந்தானே.  1.105.1 

தாளால் அரக்கன்றோள் சாய்த்த தலைமகன்றன்

நாளாதிரை யென்றே நம்பன்றன் நாமத்தால்

ஆளானார் சென்றேத்தும் ஆமாத்தூர் அம்மானைக்

கேளாச் செவியெல்லாங் கேளாச் செவிகளே. 2.44.8 

ஊர்திரை வேலை யுலாவும் உயர்மயிலைக்

கூர்தரு வேல்வல்லார் கொற்றங்கொள் சேரிதனில்

கார்தரு சோலைக் கபாலீச்சரம் அமர்ந்தான்

ஆதிரைநாள் காணாதே போதியோ பூம்பாவாய். 2.47.4 

ஞாலத்தார் ஆதிரை நாளினான் நாடொறுஞ்

சீலத்தான் மேவிய திருமழ பாடியை

ஞாலத்தான் மிக்கசீர் ஞானசம் பந்தன்சொல்

கோலத்தாற் பாடுவார் குற்றமற் றார்களே. 3.28.11

ஆதியன் ஆதிரையன் னனலாடிய ஆரழகன்

பாதியோர் மாதினொடும் பயிலும்பர மாபரமன்

போதிய லும்முடிமேற் புனலோடர வம்புனைந்த

வேதியன் மாதிமையால் விரும்பும்மிடம் வெண்டுறையே. 3.61.1 

ஊர்திரை வேலையுள் ளானும் உலகிறந் தொண்பொரு ளானுஞ்

சீர்தரு பாடலுள் ளானுஞ் செங்கண் விடைக்கொடி யானும்

வார்தரு பூங்குழ லாளை மருவி யுடன்வைத் தவனும்

ஆதிரை நாளுகந் தானும் ஆரூ ரமர்ந்தஅம் மானே.  4.4.6 

முத்து விதான மணிப்பொற் கவரி முறையாலே

பத்தர்க ளோடு பாவையர் சூழப் பலிப்பின்னே

வித்தகக் கோல வெண்டலை மாலை விரதிகள்

அத்தன் ஆரூர் ஆதிரை நாளால் அதுவண்ணம்.  4.21.1 

நணியார் சேயார் நல்லார் தீயார் நாடோ றும்

பிணிதான் தீரும் என்று பிறங்கிக் கிடப்பாரும்

மணியே பொன்னே மைந்தா மணாளா என்பார்கட்

கணியான் ஆரூர் ஆதிரை நாளால் அதுவண்ணம்.  4.21.2 

வீதிகள் தோறும் வெண்கொடி யோடுவி தானங்கள் 

சோதிகள் விட்டுச் சுடர்மா மணிகள் ஒளிதோன்றச்

சாதிக ளாய பவளமு முத்துத் தாமங்கள்

ஆதி ஆரூர் ஆதிரை நாளால் அதுவண்ணம்.  4.21.3 

குணங்கள் பேசிக் கூடிப் பாடித் தொண்டர்கள்

பிணங்கித் தம்மிற் பித்தரைப் போலப் பிதற்றுவார்

வணங்கி நின்று வானவர் வந்து வைகலும்

அணங்கன் ஆரூர் ஆதிரை நாளால் அதுவண்ணம்.  4.21.4 

நிலவெண் சங்கும் பறையும் ஆர்ப்ப நிற்கில்லாப்

பலரு மிட்ட கல்ல வடங்கள் பரந்தெங்குங்

கலவ மஞ்ஞை காரென் றெண்ணிக் களித்துவந்

தலம ராரூர் ஆதிரை நாளால் அதுவண்ணம்.   4.21.5 

விம்மா வெருவா விழியாத் தெழியா வெருட்டுவார்

தம்மாண் பிலராய்த் தரியார் தலையான் முட்டுவார்

எம்மான் ஈசன் எந்தை எனப்பன் என்பார்கட்

கம்மான் ஆரூர் ஆதிரை நாளால் அதுவண்ணம்.  4.21.6 

செந்துவர் வாயார் செல்வன் சேவடி சிந்திப்பார்

மைந்தர்க ளோடு மங்கையர் கூடிம யங்குவார்

இந்திர னாதி வானவர் சித்தர் எடுத்தேத்தும்

அந்திரன் ஆரூர் ஆதிரை நாளால் அதுவண்ணம்.  4.21.7 

முடிகள் வணங்கி மூவா தார்கண் முன்செல்ல

வடிகொள் வேய்த்தோள் வான்அர மங்கையர் பின்செல்லப்

பொடிகள் பூசிப் பாடுந் தொண்டர் புடைசூழ

அடிகள் ஆரூர் ஆதிரை நாளால் அதுவண்ணம்.  4.21.8 

துன்பம் நும்மைத் தொழாத நாள்கள் என்பாரும்

இன்பம் நும்மை யேத்து நாள்கள் என்பாரும்

நும்பின் எம்மை நுழையப் பணியே என்பாரும்

அன்பன் ஆரூர் ஆதிரை நாளால் அதுவண்ணம்.  4.21.9 

பாரூர் பௌவத் தானைப் பத்தர் பணிந்தேத்தச்

சீரூர் பாடல் ஆடல் அறாத செம்மாப்பார்ந்

தோரூர் ஒழியா துலகம் எங்கும் எடுத்தேத்தும்

ஆரூ ரன்றன் ஆதிரை நாளால் அதுவண்ணம்.  4.21.10 

 

மூவகை மூவர் போலும் முற்றுமா நெற்றிக் கண்ணர்

நாவகை நாவர் போலும் நான்மறை ஞான மெல்லாம்

ஆவகை யாவர் போலும் ஆதிரை நாளர் போலுந்

தேவர்கள் தேவர் போலுந் திருப்பயற் றூர னாரே.  4.32.5 

 ஏற்று வெல்கொடி ஈசன்ற னாதிரை

நாற்றஞ் சூடுவர் நன்னறுந் திங்களார்

நீற்றுச் சந்தன வெள்ளை விரவலார்

வேற்றுக் கோலங்கொள் வீழி மிழலையே.  5.12.2 

வேத நாயகன் வேதியர் நாயகன் 

மாதின் நாயகன் மாதவர் நாயகன் 

ஆதி நாயகன் ஆதிரை நாயகன் 

பூத நாயகன் புண்ணிய மூர்த்தியே.  5.100.1 

பொடிநாறு மேனியர் பூதிப் பையர்

       புலித்தோலர் பொங்கரவர் பூண நூலர்

அடிநாறு கமலத்தர் ஆரூ ராதி

       ஆனஞ்சு மாடுமா திரையி னார்தாங்

கடிநாறு பூஞ்சோலை கமழ்ந்து நாறுங் 

       கழிப்பாலை மேய கபாலப் பனார்

மடிநாறு மேனியிம் மாயம் நீங்க 

       வழிவைத்தார்க் கவ்வழியே போது நாமே. 6.12.4 

அரைசே ரரவனாம் ஆலத் தானாம்

       ஆதிரை நாளானாம் அண்ட வானோர்

திரைசேர் திருமுடித் திங்க ளானாந்

       தீவினை நாசனென் சிந்தை யானாம்

உரைசே ருலகத்தா ருள்ளா னுமாம்

       உமையாளோர் பாகனாம் ஓத வேலிக்

கரைசேர் கடல்நஞ்சை யுண்டா னாகுங்

       கண்ணாங் கருகாவூ ரெந்தை தானே.  6.15.7 

மாதூரும் வாணெடுங்கண் செவ்வாய் மென்றோள்

       மலைமகளை மார்பத் தணைத்தார் போலும்

மூதூர் முதுதிரைக ளானார் போலும்

       முதலு மிறுதியு மில்லார் போலுந்

தீதூர நல்வினையாய் நின்றார் போலுந்

       திசையெட்டுந் தாமேயாஞ் செல்வர் போலும்

ஆதிரை நாளாய் அமர்ந்தார் போலும்

       ஆக்கூரில் தான்றோன்றி யப்ப னாரே.  6.21.6 

பூதியனைப் பொன்வரையே போல்வான் றன்னைப்

       புரிசடைமேற் புனல்கரந்த புனிதன் றன்னை

வேதியனை வெண்காடு மேயான் றன்னை

       வெள்ளேற்றின் மேலானை விண்ணோர்க் கெல்லாம்

ஆதியனை ஆதிரைநன் னாளான் றன்னை

       அம்மானை மைம்மேவு கண்ணி யாளோர்

பாதியனைப் பள்ளியின்முக் கூட லானைப்

       பயிலாதே பாழேநான் உழன்ற வாறே.  6.69.3 

தொண்டர்க்குத் தூநெறியாய் நின்றான் றன்னைச்

       சூழ்நரகில் வீழாமே காப்பான் றன்னை

அண்டத்துக் கப்பாலைக் கப்பா லானை

       ஆதிரைநா ளாதரித்த அம்மான் றன்னை

முண்டத்தின் முளைத்தெழுந்த தீயா னானை

       மூவுருவத் தோருருவாய் முதலாய் நின்ற

தண்டத்திற் றலையாலங் காடன் றன்னைச்

       சாராதே சாலநாள் போக்கி னேனே.  6.79.1 

அங்கமே பூண்டாய் அனலா டினாய்

       ஆதிரையாய் ஆல்நிழலாய் ஆனே றூர்ந்தாய்

பங்கமொன் றில்லாத படர்ச டையினாய்

       பாம்பொடு திங்கள் பகைதீர்த் தாண்டாய்

சங்கையொன் றின்றியே தேவர் வேண்டச்

       சமுத்திரத்தின் நஞ்சுண்டு சாவா மூவாச்

சிங்கமே உன்னடிக்கே போது கின்றேன்

       திருப்புகலூர் மேவிய தேவ தேவே.  6.99.2 

திங்களூர் திருவா திரையான் பட்டினமூர்

நங்களூர் நறையூர் நனிநா லிசைநாலூர்

தங்களூர் தமிழான் என்றுபா விக்கவல்ல

எங்களூர் எய்தமான் இடையா றிடைமருதே.  7.31.6 

ஆதியன் ஆதிரை யன்அயன் மால்அறி தற்கரிய

சோதியன் சொற்பொரு ளாய்ச்சுருங் காமறை நான்கினையும்

ஓதியன் உம்பர்தங் கோனுல கத்தினுள் எவ்வுயிர்க்கும்

நாதியன் நம்பெரு மான்நண்ணும் ஊர்நனி பள்ளியதே.  7.97.1 

ஆரார் வந்தார்? அமரர் குழாத்தில் அணியுடை ஆதிரைநாள்

நாராயணனொடு நான்முகன் அங்கி இரவியும் இந்திரனும்

தேரார் வீதியில் தேவர் குழாங்கள் திசையனைத்தும் நிறைந்து

பாரார் தொல்புகழ் பாடியும் ஆடியும் பல்லாண்டு கூறுதுமே. 9.திருப்பல்லாண்டு.12

சித்தம் நிலாவும் தென் திரு ஆரூர் நகராளும்   

 மைத் தழை கண்டர் ஆதிரை நாளின் மகிழ் செல்வம்

 இத் தகைமைத்து என்று என் மொழிகேன்? என்று அருள் செய்தார்  

 முத்து விதான மணிப் பொன் கவரி மொழி மாலை    12.பெரிய புராணம்.1500

ஆய செய் கையில் அமரும் நாள் ஆதிரை நாளில்     

 மேய பூசனை நியதியை விதியினால் முடித்துத்      

 தூய தொண்டனார் தொல்லை நீடு அயவந்தி அமர்ந்த

 நாயனாரையும் அருச்சனை புரிந்திட நயந்தார் 12.பெரிய புராணம்.1834